aksar sab ko rasta dene vaale log — Arif Shafiq

jo mere gaanv ke kheton mein bhuuk ugne lagi
mire kisaanon ne shahron mein naukri kar li

apne darvaaze pe khud hi dastakein detaa hai vo
ajnabi lahje mein phir vo puchhtaa hai kaun hai

kaisaa maatam kaisaa ronaa miTTi kaa
TuuT gayaa hai ek khilaunaa miTTi kaa

puchhte hain log mujh se kyon miraa naam-o-nasab
soch lein paighambaron se silsila mil jaaegaa

aisaa na ho vo khud ko samajhne lage khudaa
itnaa bhi jhuknaa Thiik nahin iltimaas mein

jab koi ahm faisla karnaa
apne bachchon se mashvara karnaa