ab bhi mat puchh mire dil mein hai kyaa rahne de — Arifa Shahzad

tujhe aaghaaz hi se paDh liyaa thaa
tire chehre pe sab likhaa huaa thaa

— Arifa Shahzad

nashtar jaisaa andar ik chubhtaa kaanTaa hai
jaane us ne dukh baanTaa yaa dil baanTaa hai

— Arifa Shahzad

sab mumkin hai farz hi kar lo
khushbu apni ok mein bhar lo

— Arifa Shahzad

din ki aankhein band hui hain
aankhon mein hai raat khabar lo

— Arifa Shahzad

khvaab mein jaagti be-khvaabi pataa puchhti hai
kyaa kahein niind bhi hoti hai sulaane vaali

— Arifa Shahzad

main baDaa ho gayaa huun magar bachpanaa
mere dil se kabhi bhi gayaa hi nahin

— Divyansh Rawat

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

— Shakeel Badayuni

havaa shaakhon mein rukne aur ulajhne ko hai is lamhe
guzarte baadalon mein chaand haail hone vaalaa hai

— Zafar Iqbal

chaand ne taan li hai chaadar-e-abr
ab vo kapDe badal rahi hogi

— Jaun Elia

main badalte hue haalaat mein Dhal jaataa huun
dekhne vaale adaakaar samajhte hain mujhe

— Shahid Zaki