khvaab mein jaagti be-khvaabi pataa puchhti hai — Arifa Shahzad

tujhe aaghaaz hi se paDh liyaa thaa
tire chehre pe sab likhaa huaa thaa

nashtar jaisaa andar ik chubhtaa kaanTaa hai
jaane us ne dukh baanTaa yaa dil baanTaa hai

ab bhi mat puchh mire dil mein hai kyaa rahne de
baat vaise bhi nahin tujh ko bataane vaali

sab mumkin hai farz hi kar lo
khushbu apni ok mein bhar lo

din ki aankhein band hui hain
aankhon mein hai raat khabar lo

mere khvaabon ke jharokon ko sajaate rahiye
na sahi vasl magar yaad to aate rahiye

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi

jab bhi TuuTaa mire khvaabon kaa hasin taaj-mahal
main ne ghabraa ke kahi 'mir' ke lahje mein ghazal

jo bhi narmi hai khayaalon mein na hone se hai
khvaab aankhon se nikal jaaein to patthar ho jaaein

khvaab to khvaab hain pal bhar mein bikhar jaate hain
sach to ye hai ki bas ik kaahish-e-jaan raqs mein hai

ye mere saathi hain pyaare saathi magar inhein bhi nahin gavaaraa
main apni vahshat ke maqbare se nai tamannaa ke khvaab dekhun