ajab andaaz ke shaam-o-sahar hain — Asad Bhopali

aise iqraar mein inkaar ke sau pahlu hain
vo to kahiye ki labon pe na tabassum aae

— Asad Bhopali

itnaa to bataa jaao khafaa hone se pahle
vo kyaa karein jo tum se khafaa ho nahin sakte

— Asad Bhopali

ai mauj-e-havaadis tujhe maalum nahin kyaa
ham ahl-e-mohabbat hain fanaa ho nahin sakte

— Asad Bhopali

na bazm apni na apnaa saaqi na shisha apnaa na jaam apnaa
agar yahi hai nizaam-e-hasti to zindagi ko salaam apnaa

— Asad Bhopali

haalaat ne kisi se judaa kar diyaa mujhe
ab zindagi se zindagi mahrum ho gai

— Asad Bhopali

ishq ko jab husn se nazrein milaanaa aa gayaa
khud-ba-khud ghabraa ke qadmon mein zamaana aa gayaa

— Asad Bhopali

andheri shab kaa ye khvaab-manzar mujhe ujaalon se bhar rahaa hai
to raat itni tavil kar de ki taa-qayaamat sahar na aae

— Aleena Itrat

haan dikhaa de ai tasavvur phir vo subh o shaam tu
dauD pichhe ki taraf ai gardish-e-ayyaam tu

— Allama Iqbal

aankhon mein meri subh-e-qayaamat gai jhamak
siine se us pari ke jo parda ulaT gayaa

— Nazeer Akbar Abadi

har subh nikalte hain yahi soch ke ghar se
bikhri hui duniyaa ko sameTeinge kisi din

— Sayyed Riyaz Raheem

shab-e-vaada fasil-e-hijr se aage chamaktaa hai tiraa ism-e-sitaara-ju
ki jaise koi paivand-e-ridaa-e-subh aa jaae kisi qindil ki zad mein

— Zahid Masood

subh se chalte chalte aakhir shaam hui aavaara-e-dil
ab main kis manzil mein pahunchaa ab ghar kitni duur rahaa

— Aziz Hamid Madni