Subah

ye ham jo peT se hī sochte haiñ shaam o sahar
kabhī to jā.eñge is dāl-bhāt se aage

phir sar-e-sub.h kisī dard ke dar vā karne
dhaan ke khet se ik mauj-e-havā aa.ī hai

ye daaġh daaġh ujālā ye shab-gazīda sahar
vo intizār thā jis kā ye vo sahar to nahīñ

kab Thahregā dard ai dil kab raat basar hogī
sunte the vo ā.eñge sunte the sahar hogī

dil kī betābī nahīñ Thaharne detī hai mujhe
din kahīñ raat kahīñ sub.h kahīñ shaam kahīñ

use sub.h-e-azal inkār kī jur.at huī kyūñkar
mujhe mālūm kyā vo rāz-dāñ terā hai yā merā

vasl ke din shab-e-hijrāñ kī haqīqat mat pūchh
bhuul jaanī hai mujhe sub.h kuuñ phir shaam kī baat

muntazir us ke dilā tā-ba-kujā baiThnā
shaam huī ab chalo sub.h phir aa baiThnā

ham ahl-e-qafas tanhā bhī nahīñ har roz nasīm-e-sub.h-e-vatan
yādoñ se mo.attar aatī hai ashkoñ se munavvar jaatī hai

jo nafas thā ḳhār-e-gulū banā jo uThe the haath lahū hue
vo nashāt-e-āh-e-sahr ga.ī vo vaqār-e-dast-e-duā gayā

jab tujhe yaad kar liyā sub.h mahak mahak uThī
jab tirā ġham jagā liyā raat machal machal ga.ī

āñkhoñ meñ merī sub.h-e-qayāmat ga.ī jhamak
siine se us parī ke jo parda ulaT gayā

tum aa.e ho na shab-e-intizār guzrī hai
talāsh meñ hai sahar baar baar guzrī hai

rang-e-shikasta sub.h-e-bahār-e-nazāra hai
ye vaqt hai shaguftan-e-gul-hā-e-nāz kā

haañ dikhā de ai tasavvur phir vo sub.h o shaam tū
dauḌ pīchhe kī taraf ai gardish-e-ayyām tū

qulqul-e-mīnā sadā nāqūs kī shor-e-azāñ
ThanDe ThanDe dīdanī hai garmī-e-bāzār-e-sub.h

'attār' ho 'rūmī' ho 'rāzī' ho 'ġhazālī' ho
kuchh haath nahīñ aatā be-āh-e-sahar-gāhī

vasl kī raat ke sivā koī shaam
saath le kar sahar nahīñ aatī

ye kyā fusūñ hai ki sub.h-e-gurez kā pahlū
shab-e-visāl tirī baat baat se niklā

raat pī zamzam pe mai aur sub.h-dam
dho.e dhabbe jāma-e-ehrām ke