apnaa saani vo aap hi nikle — Ashique Akbarabadi

vaada-e-vasl gar kisi se nahin
aap kyuun be-qaraar phirte hain

tire kuche mein koi huur aa jaati to main kahtaa
ki vo jannat to kyaa jannat hai jannat aisi hoti hai

jalva nigaah mein hai kisi be-niyaaz kaa
putli hamaari aankh ki putlaa hai naaz kaa

aarzu ik but ki le kar jaate hain kaabe ko ham
turfa tohfa paas hai ahl-e-haram ke vaaste

gadaa-e-kucha-e-jaanaan huun martaba hai baDaa
ki mere naam hai jaagir be-navaai ki

na chitvan aap ki Thahri na dil miraa Thahraa
use sukun ho to is ko bhi kuchh qaraar rahe