hamein bannaa paDegaa alien varna mire pyaare — Asif Jaanif

main tumhaare baghair aisaa huun
jis tarah diin hai nabi ke baghair

— Asif Jaanif

tu khudaa se bhi duur hai laDki
aur dil kaaein kaaein kar rahaa hai

— Asif Jaanif

ye kaise log tire aas-paas ghumte hain
inhein to dekh ke meraa dimaagh ghumtaa hai

— Asif Jaanif

udaas logon ke maathon ko chumte rahnaa
unhi ki vajh se bar-'aks ho gae tum log

— Asif Jaanif

bahut hi kam ko mili hain mohabbatein 'jaanif'
ziyaada-tar ko to mahbub ne du'aa di hai

— Asif Jaanif

mujhe malaal nahin teri bevafaai kaa
main apne aap se aankhein nahin milaa saktaa

— Asif Jaanif

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

— Ibn

sabhi se jab mohabbat chaahte ho
mohabbat kyon nahin karte sabhi se

— Saleem Amrohvi

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

na paak hogaa kabhi husn o ishq kaa jhagDaa
vo qissa hai ye ki jis kaa koi gavaah nahin

— Haidar Ali Aatish

baat karnaa pyaar ki aasaan se aasaan hai
ishq karnaa karte rahnaa hai kaThin se bhi kaThin

— Raghvendra Dwivedi

sau fasaad ek ishq mein uTThe
boyaa ik tukhm uge hazaar darakht

— Imdad Ali Bahr