mujh ko khvaabon ke baagh mein laa kar — Asima Tahir

nahin vo itnaa bhi paagal nahin thaa
jo mar jaataa miri vaabastagi mein

— Asima Tahir

mire vajud ke andar hai ik qadim makaan
jahaan se main ye udaasi udhaar leti huun

— Asima Tahir

khvaab kaa intizaar khatm huaa
aankh ko niind se jagaate hain

— Asima Tahir

ham ne jab haal-e-dil un se apnaa kahaa
vo bhi qissa kisi kaa sunaane lage

— Asima Tahir

shahzaadi ke kaanon mein jo baat kahi thi ik tu ne
baad tire vo baat tire hi afsaanon mein gunjti hai

— Asima Tahir

Dubne ki na tairne ki khabar
ishq-dariyaa mein bas utar dekhun

— Asima Tahir

jhaankte raat ke garebaan se
ham ne sau aaftaab dekhe hain

— Salman Akhtar

shor din ko nahin sone detaa
shab ko sannaaTaa jagaa detaa hai

— Saifuddin Saif

raushni ho rahi hai kuchh mahsus
kyaa shab aakhir tamaam ko pahunchi

— Aslam Farrukhi

shikva-e-zulmat-e-shab se to kahin behtar thaa
apne hisse ki koi shama jalaate jaate

— Ahmad Faraz

kab tak paDe rahoge havaaon ke haath mein
kab tak chalegaa khokhle shabdon kaa kaarobaar

— Adil Mansuri

kal yahi bachche samundar ko muqaabil paaeinge
aaj tairaate hain jo kaaghaz ki nannhi kashtiyaan

— Hasan Akbar Kamal