uDaa hai rafta rafta rang tasvir-e-mohabbat kaa — Aslam Ansari

jaane vaale ko kahaan rok sakaa hai koi
tum chale ho to koi rokne vaalaa bhi nahin

— Aslam Ansari

divaar-e-khastagi huun mujhe haath mat lagaa
main gir paDungaa dekh mujhe aasraa na de

— Aslam Ansari

kise kahein ki rifaaqat kaa daagh hai dil par
bichhaDne vaalaa to khul kar kabhi milaa hi na thaa

— Aslam Ansari

khafaa na ho ki tiraa husn hi kuchh aisaa thaa
main tujh se pyaar na kartaa to aur kyaa kartaa

— Aslam Ansari

jise darpesh judaai ho use kyaa maalum
kaun si baat ko kis tarah bayaan honaa hai

— Aslam Ansari

ham ko pahchaan ki ai bazm-e-chaman-zaar-e-vajud
ham na hote to tujhe kis ne sanvaaraa hotaa

— Aslam Ansari

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

— Ibn

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

na paak hogaa kabhi husn o ishq kaa jhagDaa
vo qissa hai ye ki jis kaa koi gavaah nahin

— Haidar Ali Aatish

sabhi se jab mohabbat chaahte ho
mohabbat kyon nahin karte sabhi se

— Saleem Amrohvi

baat karnaa pyaar ki aasaan se aasaan hai
ishq karnaa karte rahnaa hai kaThin se bhi kaThin

— Raghvendra Dwivedi

sau fasaad ek ishq mein uTThe
boyaa ik tukhm uge hazaar darakht

— Imdad Ali Bahr