tegh-e-nafas ko bahut naaz thaa raftaar par — Aslam Mahmood

paanv us ke bhi nahin uThte mire ghar ki taraf
aur ab ke raasta badlaa huaa meraa bhi hai

— Aslam Mahmood

guzarte jaa rahe hain qaafile tu hi zaraa ruk jaa
ghubaar-e-raah tere saath chalnaa chaahtaa huun main

— Aslam Mahmood

dekh aa kar ki tire hijr mein bhi zinda hain
tujh se bichhDe the to lagtaa thaa ki mar jaaeinge

— Aslam Mahmood

tere kuche ki havaa puchhe hai ab ham se
naam kyaa hai kyaa nasab hai ham kahaan ke hain

— Aslam Mahmood

ab ye samjhe ki andheraa bhi zaruri shai hai
bujh gaiin aankhein ujaalon ki faraavaani se

— Aslam Mahmood

vo dard huun koi chaara nahin hai jis kaa kahin
vo zakhm huun ki hai dushvaar indimaal miraa

— Aslam Mahmood

na tum hosh mein ho na ham hosh mein hain
chalo mai-kade mein vahin baat hogi

— Bashir Badr

sau fasaad ek ishq mein uTThe
boyaa ik tukhm uge hazaar darakht

— Imdad Ali Bahr

kisi ke zakhm par chaahat se paTTi kaun baandhegaa
agar bahnein nahin hongi to raakhi kaun baandhegaa

— Munawwar Rana

mujh tak kab un ki bazm mein aataa thaa daur-e-jaam
saaqi ne kuchh milaa na diyaa ho sharaab mein

— Mirza Ghalib

roza-daaraan-e-judaai kuun kham-e-abru-e-yaar
maah-e-id-e-ramazaan thaa mujhe maalum na thaa

— Siraj Aurangabadi

khudaa ke haath hai biknaa na biknaa mai kaa ai saaqi
baraabar masjid-e-jaame ke ham ne ab dukaan rakh di

— Riyaz Khairabadi