na tum hosh mein ho na ham hosh mein hain — Bashir Badr

udaas aankhon se aansu nahin nikalte hain
ye motiyon ki tarah sipiyon mein palte hain

bhuul shaayad bahut baDi kar li
dil ne duniyaa se dosti kar li

ik shaam ke saae tale baiThe rahe vo der tak
aankhon se ki baatein bahut munh se kahaa kuchh bhi nahin

khudaa aise ehsaas kaa naam hai
rahe saamne aur dikhaai na de

hasin to aur hain lekin koi kahaan tujh saa
jo dil jalaae bahut phir bhi dilrubaa hi lage

khudaa ki itni baDi kaaenaat mein main ne
bas ek shakhs ko maangaa mujhe vahi na milaa

kahaan milegi misaal meri sitamgari ki
ki main gulaabon ke zakhm kaanTon se si rahaa huun

aae kuchh abr kuchh sharaab aae
is ke baa'd aae jo azaab aae

khudaa ke haath hai biknaa na biknaa mai kaa ai saaqi
baraabar masjid-e-jaame ke ham ne ab dukaan rakh di

zindagi zor hai ravaani kaa
kyaa thamegaa bahaav paani kaa

shah-naame likkhe hain khanDaraat ki har iinT par
har jagah hai dafn ik afsaana tere shahr mein

sharaab band ho saaqi ke bas ki baat nahin
tamaam shahar hai do chaar das ki baat nahin