vatan ki khaak se mar kar bhi ham ko uns baaqi hai — Chakbast Braj Narayan

kiyaa hai faash parda kufr-o-din kaa is qadar main ne
ki dushman hai barhaman aur adu shaikh-e-haram meraa

— Chakbast Braj Narayan

zindagi kyaa hai anaasir mein zuhur-e-tartib
maut kyaa hai inhin ajzaa kaa pareshaan honaa

— Chakbast Braj Narayan

agar dard-e-mohabbat se na insaan aashnaa hotaa
na kuchh marne kaa gham hotaa na jiine kaa mazaa hotaa

— Chakbast Braj Narayan

adab taalim kaa jauhar hai zevar hai javaani kaa
vahi shaagird hain jo khidmat-e-ustaad karte hain

— Chakbast Braj Narayan

ik silsila havas kaa hai insaan ki zindagi
is ek musht-e-khaak ko gham do-jahaan ke hain

— Chakbast Braj Narayan

hai miraa zabt-e-junun josh-e-junun se baDh kar
nang hai mere liye chaak-e-garebaan honaa

— Chakbast Braj Narayan

ret par ik nishaan hai shaayad
ye hamaaraa makaan hai shaayad

— Muzaffar Abdali

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

kaho kyaa mehrbaan naa-mehrbaan taqdir hoti hai
kahaa maan ki duaaon mein baDi taasir hoti hai

— Anjum Khaleeq

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

— Irfan Sattar

ghulaami mein na kaam aati hain shamshirein na tadbirein
jo ho zauq-e-yaqin paidaa to kaT jaati hain zanjirein

— Allama Iqbal

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

— Parveen Shakir