hai miraa zabt-e-junun josh-e-junun se baDh kar — Chakbast Braj Narayan

agar dard-e-mohabbat se na insaan aashnaa hotaa
na kuchh marne kaa gham hotaa na jiine kaa mazaa hotaa

adab taalim kaa jauhar hai zevar hai javaani kaa
vahi shaagird hain jo khidmat-e-ustaad karte hain

ik silsila havas kaa hai insaan ki zindagi
is ek musht-e-khaak ko gham do-jahaan ke hain

gunah-gaaron mein shaamil hain gunaahon se nahin vaaqif
sazaa ko jaante hain ham khudaa jaane khataa kyaa hai

is ko naa-qadri-e-aalam kaa sila kahte hain
mar chuke ham to zamaane ne bahut yaad kiyaa

zindagi kyaa hai anaasir mein zuhur-e-tartib
maut kyaa hai inhin ajzaa kaa pareshaan honaa