chhin leti hai aadmi kaa vaqaar — Dr. Jafar Askari

mullaa tiri akaD se ye hone lagaa gumaan
jaise khudaa zamin pe numudaar ho gayaa

— Dr. Jafar Askari

niind aati hi nahin thi aagahi ke dard se
maut ne aaghosh mein le kar sulaayaa hai mujhe

— Dr. Jafar Askari

miT jaaegi vatan se jahaalat ki tirgi
vo dekh inqalaab kaa suraj qarib hai

— Dr. Jafar Askari

ik maan ke dam se ziist mein raunaq thi barqaraar
ab vo nahin to raunaq-e-bazm-e-jahaan nahin

— Dr. Jafar Askari

mazhab se us ke dil mein na paidaa huaa gudaaz
ye aadmi to aur bhi saffaak ho gayaa

— Dr. Jafar Askari

barsaat muflison ki sadaa se raqib hai
kachche makaan girne kaa mausam 'ajib hai

— Dr. Jafar Askari

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

— Ibn

jab ki pahlu se yaar uThtaa hai
dard be-ikhtiyaar uThtaa hai

— Mir Taqi Mir

kaabe ko jaataa kis liye hindostaan se main
kis but mein shahr-e-hind ke shaan-e-khudaa na thi

— Rind Lakhnavi

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

— Nida Fazli

dekhe na mujhe kyunkar az-chashm-e-hiqaarat-u
vo sarv-e-javaan yaaro man-faakhta-e-piram

— Nazeer Akbar Abadi

baat karnaa pyaar ki aasaan se aasaan hai
ishq karnaa karte rahnaa hai kaThin se bhi kaThin

— Raghvendra Dwivedi