na jaane mohabbat kaa anjaam kyaa hai — Ehsan Danish Kandhlvi

kuchh log jo savaar hain kaaghaz ki naav par
tohmat taraashte hain havaa ke dabaav par

— Ehsan Danish Kandhlvi

tum saada-mizaaji se miTe phirte ho jis par
vo shakhs to duniyaa mein kisi kaa bhi nahin hai

— Ehsan Danish Kandhlvi

main hairaan huun ki kyuun us se hui thi dosti apni
mujhe kaise gavaara ho gai thi dushmani apni

— Ehsan Danish Kandhlvi

log yuun dekh ke hans dete hain
tu mujhe bhuul gayaa ho jaise

— Ehsan Danish Kandhlvi

shorish-e-ishq mein hai husn baraabar kaa sharik
soch kar jurm-e-tamannaa ki sazaa do ham ko

— Ehsan Danish Kandhlvi

kis kis ki zabaan rokne jaaun tiri khaatir
kis kis ki tabaahi mein tiraa haath nahin hai

— Ehsan Danish Kandhlvi

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

— Ibn

sabhi se jab mohabbat chaahte ho
mohabbat kyon nahin karte sabhi se

— Saleem Amrohvi

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

na paak hogaa kabhi husn o ishq kaa jhagDaa
vo qissa hai ye ki jis kaa koi gavaah nahin

— Haidar Ali Aatish

sau fasaad ek ishq mein uTThe
boyaa ik tukhm uge hazaar darakht

— Imdad Ali Bahr

sach ishq mein hain aashiq o maashuq baraabar
jo mushkil-e-majnun hai so hai mushkil-e-lailaa

— Mushafi Ghulam Hamdani