kuchh na kuchh bolte raho ham se — Fahmi Badayuni

kaash vo raaste mein mil jaae
mujh ko munh pher kar guzarnaa hai

— Fahmi Badayuni

khuun pilaa kar jo sher paalaa thaa
us ne circus mein naukri kar li

— Fahmi Badayuni

pareshaan hai vo jhuTaa ishq kar ke
vafaa karne ki naubat aa gai hai

— Fahmi Badayuni

Tahalte phir rahe hain saare ghar mein
tiri khaali jagah ko bhar rahe hain

— Fahmi Badayuni

aaj paivand ki zarurat hai
ye sazaa hai rafu na karne ki

— Fahmi Badayuni

puchh lete vo bas mizaaj miraa
kitnaa aasaan thaa ilaaj miraa

— Fahmi Badayuni

main baDaa ho gayaa huun magar bachpanaa
mere dil se kabhi bhi gayaa hi nahin

— Divyansh Rawat

raat yuun dil mein tiri khoi hui yaad aai
jaise viraane mein chupke se bahaar aa jaae

— Faiz Ahmad Faiz

dekhoge to aaegi tumhein apni jafaa yaad
khaamosh jise paaoge khaamosh na hogaa

— Anjum Rumani

ye dil kaa karb labon tak kabhi na aaegaa
mire liye ye khamoshi kaa irtiqaa hi sahi

— Anwar Feroz

rah-e-hayaat mein shaayad hi vo maqaam aae
ki naghma-haa-e-junun par sukut taari ho

— Anwar Kaifi

khuli zabaan to zarf un kaa ho gayaa zaahir
hazaar bhed chhupaa rakkhe the khamoshi mein

— Anwar Sadeed