is shahr-e-tamannaa mein kyaa chhaanv mile mujh ko — Fatima Taj

kyaa aap zamaane ko ye samjhaa nahin sakte
ab TuuTe khilaune hamein bahlaa nahin sakte

— Fatima Taj

maanaa ki viraasat mein mili khaana-badoshi
lekin ye zamin chhoD ke ham jaa nahin sakte

— Fatima Taj

ahl-e-khirad ko ab bhi nahin hai koi khabar
ahl-e-junun bhi karte hain fikr-o-nazar ki baat

— Fatima Taj

ye shahr hamaaraa hai sabhi log hain apne
ham log paraae kabhi kahlaa nahin sakte

— Fatima Taj

maanaa ki aashiyaanon ki taamir ho gai
apnaa to aashiyaan hamein jaltaa huaa milaa

— Fatima Taj

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

— Jafar Shirazi

main ne apni palkon par gham-kade sajaae hain
aarzu ke maatam mein sogvaar hasti hai

— Hanif Fauq

us shaan-e-aajizi ke fidaa jis ne 'aarzu'
har naaz har ghurur ke qaabil banaa diyaa

— Arzoo Lakhnavi

bas ek pal ki tamannaa-e-vasl ki khaatir
tamaam 'umr lagaa di gai sanvarne mein

— Wafa Naqvi

ab bhi barsaat ki raaton mein badan TuTtaa hai
jaag uThti hain ajab khvaahishein angDaai ki

— Parveen Shakir

sab ummidein mire aashob-e-tamannaa tak thiin
bastiyaan ho gaiin gharqaab to dariyaa utraa

— Hasan Abidi