muddat ke baa'd aaj main office nahin gayaa — Fazil Jamili

misaal-e-shama jalaa huun dhuaan saa bikhraa huun
main intizaar ki har kaifiyat se guzraa huun

— Fazil Jamili

safed-poshi-e-dil kaa bharam bhi rakhnaa hai
tiri khushi ke liye teraa gham bhi rakhnaa hai

— Fazil Jamili

ab kaun jaa ke saahib-e-mimbar se ye kahe
kyuun khuun pi rahaa hai sitamgar sharaab pi

— Fazil Jamili

puraane yaar bhi aapas mein ab nahin milte
na jaane kaun kahaan dil lagaa ke baiTh gayaa

— Fazil Jamili

zindagi ho to kai kaam nikal aate hain
yaad aaungaa kabhi main bhi zarurat mein use

— Fazil Jamili

tum kabhi ek nazar meri taraf bhi dekho
ik tavaqqo hi to hai koi guzaarish to nahin

— Fazil Jamili

na tum hosh mein ho na ham hosh mein hain
chalo mai-kade mein vahin baat hogi

— Bashir Badr

kisi ke zakhm par chaahat se paTTi kaun baandhegaa
agar bahnein nahin hongi to raakhi kaun baandhegaa

— Munawwar Rana

sau fasaad ek ishq mein uTThe
boyaa ik tukhm uge hazaar darakht

— Imdad Ali Bahr

roza-daaraan-e-judaai kuun kham-e-abru-e-yaar
maah-e-id-e-ramazaan thaa mujhe maalum na thaa

— Siraj Aurangabadi

koi saaghar pe saaghar pi rahaa hai koi tishna hai
murattab is tarah aain-e-mai-khaana nahin hotaa

— Haneef Akhgar

khudaa ke haath hai biknaa na biknaa mai kaa ai saaqi
baraabar masjid-e-jaame ke ham ne ab dukaan rakh di

— Riyaz Khairabadi