rukaa huun kis ke vahm mein mire gumaan mein nahin — Ghulam Husain Sajid

mataa-e-barg-o-samar vahi hai shabaahat-e-rang-o-bu vahi hai
khulaa ki is baar bhi chaman par giraft-e-dast-e-numu vahi hai

— Ghulam Husain Sajid

ek khvaahish hai jo shaayad umr bhar puuri na ho
ek sapne se hamesha pyaar karnaa hai mujhe

— Ghulam Husain Sajid

is andhere mein charaagh-e-khvaab ki khvaahish nahin
ye bhi kyaa kam hai ki thoDi der so jaataa huun main

— Ghulam Husain Sajid

ham musaafir hain gard-e-safar hain magar ai shab-e-hijr ham koi bachche nahin
jo abhi aansuon mein nahaa kar gae aur abhi muskuraate palaT aaeinge

— Ghulam Husain Sajid

agar hai insaan kaa muqaddar khud apni miTTi kaa rizq honaa
to phir zamin par ye aasmaan kaa vajud kis qahr ke liye hai

— Ghulam Husain Sajid

kisi ki yaad se dil kaa andheraa aur baDhtaa hai
ye ghar mere sulagne se munavvar ho nahin saktaa

— Ghulam Husain Sajid

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

ret par ik nishaan hai shaayad
ye hamaaraa makaan hai shaayad

— Muzaffar Abdali

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

— Parveen Shakir

pyaaso raho na dasht mein baarish ke muntazir
maaro zamin pe paanv ki paani nikal paDe

— Iqbal Sajid

ghulaami mein na kaam aati hain shamshirein na tadbirein
jo ho zauq-e-yaqin paidaa to kaT jaati hain zanjirein

— Allama Iqbal

aasmaan jhaank rahaa hai 'khaalid'
chaand kamre mein mire utraa hai

— Khalid Sharif