tire giton kaa matlab aur hai kuchh — Hamida Shaheen

mere dil ki shaakh pe jaanaan
har mausam mein tu khiltaa hai

— Hamida Shaheen

balaa ki tamkanat se ab siyaahi bolti hai
hamaari chup se shah paa kar tabaahi bolti hai

— Hamida Shaheen

kaun badan se aage dekhe aurat ko
sab ki aankhein girvi hain is nagri mein

— Hamida Shaheen

hijr ki talkhi zahr bani hai miThi baatein bhejo naa
khud ko dekhe arsa guzraa apni aankhein bhejo naa

— Hamida Shaheen

go ek aziyyat hai tiraa rang-e-taghaaful
ye rang kisi aur pe sajtaa bhi nahin khair

— Hamida Shaheen

sitaara hai koi gul hai ki dil hai
tiri Thokar mein patthar mukhtalif hai

— Hamida Shaheen

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

ret par ik nishaan hai shaayad
ye hamaaraa makaan hai shaayad

— Muzaffar Abdali

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

ghulaami mein na kaam aati hain shamshirein na tadbirein
jo ho zauq-e-yaqin paidaa to kaT jaati hain zanjirein

— Allama Iqbal

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

— Aabid Adeeb

pyaaso raho na dasht mein baarish ke muntazir
maaro zamin pe paanv ki paani nikal paDe

— Iqbal Sajid