log milne ko chale aate hain divaane se — Haneef Akhgar

koi saaghar pe saaghar pi rahaa hai koi tishna hai
murattab is tarah aain-e-mai-khaana nahin hotaa

hasin surat hamein hamesha hasin hi maalum kyuun na hoti
hasin andaaz-e-dil-navaazi hasin-tar naaz barhami kaa

kushta-e-zabt-e-fughaan naghma-e-be-saaz-o-sadaa
uf vo aansu jo lahu ban ke Tapaktaa hogaa

puchhti rahti hai jo qaisar-o-kisraa kaa mizaaj
shaan ye khaak-nashinon mein kahaan se aai

jo musaafir bhi tire kuche se guzraa hogaa
apni nazron ko bhi divaar samajhtaa hogaa

har taraf hain khaana-barbaadi ke manzar be-shumaar
kuchh Thikaana hai bhalaa is jazba-e-taamir kaa