bharosa kis qadar hai tujh ko 'akhtar' us ki rahmat par — Hari Chand Akhtar

ab aap aa gae hain to aataa nahin hai yaad
varna hamein kuchh aap se kahnaa zarur thaa

— Hari Chand Akhtar

jo Thokar hi nahin khaate vo sab kuchh hain magar vaaiz
vo jin ko dast-e-rahmat khud sambhaale aur hote hain

— Hari Chand Akhtar

shabaab aayaa kisi but par fidaa hone kaa vaqt aayaa
miri duniyaa mein bande ke khudaa hone kaa vaqt aayaa

— Hari Chand Akhtar

jinhein haasil hai teraa qurb khush-qismat sahi lekin
teri hasrat liye mar jaane vaale aur hote hain

— Hari Chand Akhtar

milegi shaikh ko jannat, hamein dozakh ataa hogaa
bas itni baat hai jis baat par mahshar bapaa hogaa

— Hari Chand Akhtar

hamein bhi aa paDaa hai doston se kaam kuchh yaani
hamaare doston ke bevafaa hone kaa vaqt aayaa

— Hari Chand Akhtar

uThaa hi laayaa sabhi raaste vo kaandhon par
yaqin us pe na kartaa to main kidhar jaataa

— Sadiq

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

nahin nahin main bahut khush rahaa huun tere baghair
yaqin kar ki ye haalat abhi abhi hui hai

— Irfan Sattar

bahut ummid thi manzil pe jaa kar chain paaeinge
magar manzil pe jab pahunche to nazm-e-kaarvaan badlaa

— Salam Sandelvi

tamaam shahr mein aisaa nahin khulus na ho
jahaan umiid ho is ki vahaan nahin miltaa

— Nida Fazli

idhar to tuul diyaa hai umiid ko us ne
udhar hayaat ataa ki hai mukhtasar mujh ko

— Kaifi Chirayyakoti