le uDaa hai tiraa khayaal hamein — Kaami Shah

diye ke aur havaaon ke maraasim khul nahin paate
nahin khultaa ki in mein se ye kis ki aazmaaish hai

faqat ghussa piye jaate hain roz o shab ke jhagDe mein
koi hangaama kar sakte jo vahshat raas aa jaati

main uDtaa rahtaa huun niile samundaron mein kahin
so titliyon ke liye khvaab laataa rahtaa huun

vaise tum achchhi laDki ho
lekin meri kyaa lagti ho

main apne dil ki kahtaa huun
tum apne dil ki sunti ho

har ek gaam pe ranj-e-safar uThaate hue
main aa paDaa huun yahaan tujh se duur jaate hue