main uDtaa rahtaa huun niile samundaron mein kahin — Kaami Shah

diye ke aur havaaon ke maraasim khul nahin paate
nahin khultaa ki in mein se ye kis ki aazmaaish hai

— Kaami Shah

faqat ghussa piye jaate hain roz o shab ke jhagDe mein
koi hangaama kar sakte jo vahshat raas aa jaati

— Kaami Shah

le uDaa hai tiraa khayaal hamein
aur ham qaafile se nikle hain

— Kaami Shah

vaise tum achchhi laDki ho
lekin meri kyaa lagti ho

— Kaami Shah

main apne dil ki kahtaa huun
tum apne dil ki sunti ho

— Kaami Shah

har ek gaam pe ranj-e-safar uThaate hue
main aa paDaa huun yahaan tujh se duur jaate hue

— Kaami Shah

mere khvaabon ke jharokon ko sajaate rahiye
na sahi vasl magar yaad to aate rahiye

— Jatinder Vir Yakhmi Jayaveer

hamaaraa ishq ravaan hai rukaavaTon mein 'zafar'
ye khvaab hai kisi divaar se nahin ruktaa

— Zafar Iqbal

ye san kar meri nindein uD gai hain
koi meraa bhi sapnaa dekhtaa hai

— Mahtab Alam

par katar paai jab na khvaabon ke
band hi kar diin khiDkiyaan main ne

— Ameeta Parsuram Meeta

balaa-e-jaan thi jo bazm-e-tamaashaa chhoD di main ne
khushaa ai zindagi khvaabon ki duniyaa chhoD di main ne

— Abu Mohammad Sahar

afsos umr kaT gai ranj-o-malaal mein
dekhaa na khvaab mein bhi jo kuchh thaa khayaal mein

— Imdad Imam Asar