main to qaabil na thaa un ke didaar ke — Kausar Siwani

jo toD doge mujhe tum bhi TuuT jaaoge
ki irtibaat-e-salaasil ki ik kaDi huun main

hamein jo fikr ki daavat na de sake 'kausar'
vo sher sher to hai ruh-e-shaaeri to nahin

kyaa dil ki pyaas thi ki bujhaai na jaa saki
baadal nichoD ke na samundar taraash ke

samundar ki tarah vusat ho jis mein
vo qatra bahr hai qatra nahin hai

zindagi kuchh to bharam rakh le vafaadaari kaa
tujh ko mar mar ke shab-o-roz sanvaaraa hai bahut

harifon ki taraf-daari se apnaa-pan kaa dam TuuTaa
baDhi kuchh aur jab duuri to qurbat kaa bharam TuuTaa