sab log hamein ek nazar aate hain — Khaleel Mamoon

hazaaron chaand sitaare chamak gae hote
kabhi nazar jo tiri maail-e-karam hoti

meri tarah se ye bhi sataayaa huaa hai kyaa
kyuun itne daagh dikhte hain mahtaab mein abhi

aisaa ho zindagi mein koi khvaab hi na ho
andhiyaari raat mein koi mahtaab hi na ho

tum nahin aaoge khabar hai hamein
phir bhi ham intizaar kar leinge

lafzon kaa khazaana bhi kabhi kaam na aae
baiThe rahein likhne ko tiraa naam na aae

vo buraai sab se meri kar rahe hain
kyuun nahin karte bayaan achchhaaiyon ko