mujh ko thakne nahin detaa ye zarurat kaa pahaaD — Meraj Faizabadi

yuun huaa phir band kar liin us ne aankhein ek din
vo samajh letaa thaa dil kaa haal chehra dekh kar

— Meraj Faizabadi

pyaas kahti hai chalo ret nichoDi jaae
apne hisse mein samundar nahin aane vaalaa

— Meraj Faizabadi

aaj bhi gaanv mein kuchh kachche makaanon vaale
ghar mein ham-saae ke faaqa nahin hone dete

— Meraj Faizabadi

shaaeri mein 'mir'-o-'ghaalib' ke zamaana ab kahaan
shohratein jab itni sasti hon adab dekhegaa kaun

— Meraj Faizabadi

zindagi di hai to jiine kaa hunar bhi denaa
paanv bakhshein hain to taufiq-e-safar bhi denaa

— Meraj Faizabadi

jo kah rahe the ki jiinaa muhaal hai tum bin
bichhaD ke mujh se vo do din udaas bhi na rahe

— Meraj Faizabadi

miri is chashm-e-tar se abr-e-baaraan ko hai kyaa nisbat
ki vo dariyaa kaa paani aur ye khun-e-dil hai barsaati

— Nazeer Akbar Abadi

mujid jo nuur kaa hai vo meraa charaagh hai
parvaana huun main anjuman-e-kaaenaat kaa

— Agha Hajju Sharaf

chaand hai paani mein yaa bhule hue chehre kaa aks
saahil-e-dariyaa pe dekho main bhi hairaani mein huun

— Kausar Mazhari

chaand bhi hairaan dariyaa bhi pareshaani mein hai
aks kis kaa hai ki itni raushni paani mein hai

— Farhat Ehsas

dil ki lahron kaa tul-o-arz na puchh
kabhu dariyaa kabhu safinaa hai

— Shaikh Zahuruddin Hatim

sab ummidein mire aashob-e-tamannaa tak thiin
bastiyaan ho gaiin gharqaab to dariyaa utraa

— Hasan Abidi