ab eatibaar nahin meri jaan kisi kaa nahin — Moid Rasheedi

bichhaDte vaqt kahnaa thaa bahut kuchh
main kyaa kahtaa judaa hone se pahle

vo chaahte hain ki har baat maan li jaae
aur ek main huun ki har baat kaaT detaa huun

havas ki dhuup mein phailaa hai shor-e-khalq-e-khudaa
sunaa kisi ne nahin bastiyon mein girya-e-khaak

mujh ko paane ki tamanna mein vo gharqaab huaa
main ne saahil ki tamanna mein use khoyaa hai

bichhaD gai thi vahi shai jo meri thi hi nahin
jo mere the hi nahin vo judaa hue bhi to kyaa

itnaa aasaan nahin lafzon ko ghazal kar lenaa
shor ko sher banaane mein jigar lagtaa hai