riste hue zakhmon kaa ho kuchh aur mudaavaa — Moin Ahsan Jazbi

tu aur gham-e-ulfat 'jazbi' mujh ko to yaqin aae na kabhi
jis qalb pe TuuTe hon patthar us qalb mein nashtar TuuT gae

— Moin Ahsan Jazbi

na aae maut khudaayaa tabaah-haali mein
ye naam hogaa gham-e-rozgaar sah na sakaa

— Moin Ahsan Jazbi

muskuraa kar Daal di rukh par naqaab
mil gayaa jo kuchh ki milnaa thaa javaab

— Moin Ahsan Jazbi

jab tujh ko tamannaa meri thi tab mujh ko tamannaa teri thi
ab tujh ko tamannaa ghair ki hai to teri tamannaa kaun kare

— Moin Ahsan Jazbi

jab kabhi kisi gul par ik zaraa nikhaar aayaa
kam-nigaah ye samjhe mausam-e-bahaar aayaa

— Moin Ahsan Jazbi

us ne is tarah mohabbat ki nigaahein Daalin
ham se duniyaa kaa koi raaz chhupaayaa na gayaa

— Moin Ahsan Jazbi

na tum hosh mein ho na ham hosh mein hain
chalo mai-kade mein vahin baat hogi

— Bashir Badr

sau fasaad ek ishq mein uTThe
boyaa ik tukhm uge hazaar darakht

— Imdad Ali Bahr

kisi ke zakhm par chaahat se paTTi kaun baandhegaa
agar bahnein nahin hongi to raakhi kaun baandhegaa

— Munawwar Rana

roza-daaraan-e-judaai kuun kham-e-abru-e-yaar
maah-e-id-e-ramazaan thaa mujhe maalum na thaa

— Siraj Aurangabadi

koi saaghar pe saaghar pi rahaa hai koi tishna hai
murattab is tarah aain-e-mai-khaana nahin hotaa

— Haneef Akhgar

zindagi zor hai ravaani kaa
kyaa thamegaa bahaav paani kaa

— Abdul Hamid Adam