pattharon pe naam likhtaa huun tiraa — Nadir Shahjahanpuri

bhare rahte hain ashk aankhon mein har dam
miri har saans mein ab gham ki bu hai

tu hi vo phuul hai jo hai mahbub
patte patte kaa Daali Daali kaa

nang hai raaz-e-mohabbat kaa numaayaan honaa
mar bhi jaaun main agar tum na pareshaan honaa

rahmat-e-haq ko na kar maayus apne feal se
vo bhalaai mein nahin jo hai buraai mein mazaa

ham dil fidaa karein ki tasadduq-e-jigar karein
jo bhi kahein huzur vahi umr bhar karein

phuul khulte hi titli bhi aai
kyaa koi dosti puraani hai