ye havaa saare charaaghon ko uDaa le jaaegi — Naseer Turabi

tujhe kyaa khabar mire be-khabar miraa silsila koi aur hai
jo mujhi ko mujh se baham kare vo gurez-paa koi aur hai

— Naseer Turabi

ye ruuh raqs-e-charaaghaan hai apne halqe mein
ye jism saaya hai aur saaya Dhal rahaa hai miyaan

— Naseer Turabi

usi ne mujh pe uThaae hain sang jis ke liye
main paash paash huaa ghar nigaar-khaana huaa

— Naseer Turabi

milne ki tarah mujh se vo pal bhar nahin miltaa
dil us se milaa jis se muqaddar nahin miltaa

— Naseer Turabi

kuchh roz nasir aao chalo ghar mein rahaa jaae
logon ko ye shikva hai ki ghar par nahin miltaa

— Naseer Turabi

shahr mein kis se sukhan rakhiye kidhar ko chaliye
itni tanhaai to ghar mein bhi hai ghar ko chaliye

— Naseer Turabi

jhaankte raat ke garebaan se
ham ne sau aaftaab dekhe hain

— Salman Akhtar

shor din ko nahin sone detaa
shab ko sannaaTaa jagaa detaa hai

— Saifuddin Saif

raushni ho rahi hai kuchh mahsus
kyaa shab aakhir tamaam ko pahunchi

— Aslam Farrukhi

andheri shab kaa ye khvaab-manzar mujhe ujaalon se bhar rahaa hai
to raat itni tavil kar de ki taa-qayaamat sahar na aae

— Aleena Itrat

shikva-e-zulmat-e-shab se to kahin behtar thaa
apne hisse ki koi shama jalaate jaate

— Ahmad Faraz

ji DhunDtaa hai phir vahi fursat ki raat din
baiThe rahein tasavvur-e-jaanaan kiye hue

— Mirza Ghalib