na jazbaat se ye safar tai huaa — Navin Joshi

ranj yuun raah-e-masaafat mein mile
kuchh kamaae kuchh viraasat mein mile

— Navin Joshi

rah gae kitne kirdaar bhitar mire
mere bhitar miraa qaafila rah gayaa

— Navin Joshi

yahi daaimi mashghala hai hamaaraa
nai chiiz le lo puraani milaa do

— Navin Joshi

is dafa to zindagi jaldi mein thi
kah do agli baar fursat mein mile

— Navin Joshi

nishaan raahi ke raahon pe ho na ho lekin
nishaan raahon ke aksar mileinge raahi pe

— Navin Joshi

kuchh vaqt zaraa aur nahar duudh ki legi
farhaad ko tesha nahin manzur huaa hai

— Navin Joshi

main baDaa ho gayaa huun magar bachpanaa
mere dil se kabhi bhi gayaa hi nahin

— Divyansh Rawat

unhein apne dil ki khabrein mire dil se mil rahi hain
main jo un se ruuTh jaaun to payaam tak na pahunche

— Shakeel Badayuni

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

— Mirza Mohammad Hadi Aziz Lakhnavi

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

— Nida Fazli

dil-e-haris hi apnaa na ho sakaa qaane
vagarna tere karam mein to kuchh kami na rahi

— Soz Hoshiarpuri

chaand ne taan li hai chaadar-e-abr
ab vo kapDe badal rahi hogi

— Jaun Elia