jis ko dil se lagaa ke rakkhaa thaa — Safiya Shamim

dasht gulzaar huaa jaataa hai
kyaa yahaan ahl-e-vafaa baiThe the

— Safiya Shamim

ronaa mujhe khizaan kaa nahin kuchh magar 'shamim'
is kaa gila hai aai chaman mein bahaar kyuun

— Safiya Shamim

hosh aayaa to kahin kuchh bhi na thaa
ham bhi kis bazm mein jaa baiThe the

— Safiya Shamim

honaa hai dard-e-ishq se gar lazzat-aashnaa
dil ko kharaab-e-talkhi-e-hijraan to kijiye

— Safiya Shamim

bahaar-e-nau ki phir hai aamad aamad
chaman ujDaa koi phir ham-nafas kyaa

— Safiya Shamim

jab ki pahlu se yaar uThtaa hai
dard be-ikhtiyaar uThtaa hai

— Mir Taqi Mir

ye aansu ponchh lijiye aur muskuraaiye
chaara nahin hai koi bhi rukhsat kiye baghair

— Nasim Zahid

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

husn jalva dikhaa gayaa apnaa
ishq baiThaa rahaa udaas kahin

— Saifuddin Saif

main ne apni palkon par gham-kade sajaae hain
aarzu ke maatam mein sogvaar hasti hai

— Hanif Fauq

ham haal to kah sakte hain apnaa pa kahein kyaa
jab vo idhar aate hain to tanhaa nahin aate

— Nazeer Akbar Abadi