is ehtimaam se aksar uThe hain paimaane — Shahab Sarmadi

nahin ki zindagi hamein kahaan kahaan liye phiri
hai yuun ki ham gae use kahaan kahaan liye hue

— Shahab Sarmadi

chaand hai teraa ham-safar koi nahin hai raahbar
aage qadam baDhaa ke rakh duur ki raushni na dekh

— Shahab Sarmadi

tum khud hi chale aaoge shaayad sar-e-manzil
ik raah nikaali hai miri dar-badari ne

— Shahab Sarmadi

baagh kaa dard usi phuul ke dil se puchho
muskuraataa huaa jo daur-e-khizaan se guzre

— Shahab Sarmadi

tiraa khayaal de gayaa hai aasraa kahin kahin
tiraa firaaq hausle baDhaa gayaa kabhi kabhi

— Shahab Sarmadi

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

ret par ik nishaan hai shaayad
ye hamaaraa makaan hai shaayad

— Muzaffar Abdali

aasmaan jhaank rahaa hai 'khaalid'
chaand kamre mein mire utraa hai

— Khalid Sharif

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

— Aabid Adeeb

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

— Parveen Shakir