tiri tarah nahin aasaan vaapsi meri — Shariq Kaifi

hain ab is fikr mein Duube hue ham
use kaise lage rote hue ham

tasalli ab hui kuchh dil ko mere
tiri galiyon ko suunaa dekh aayaa

vo baat soch ke main jis ko muddaton jiitaa
bichhaDte vaqt bataane ki kyaa zarurat thi

kaun thaa vo jis ne ye haal kiyaa hai meraa
kis ko itni aasaani se haasil thaa main

saari duniyaa se laDe jis ke liye
ek din us se bhi jhagDaa kar liyaa

ab mujhe kaun jiit saktaa hai
tu mire dil kaa aakhiri Dar thaa