Shariq Kaifi

jhuuT par us ke bharosa kar liya
dhuup itni thi ki saaya kar liya

naya yuun hai ki an-dekha hai sab kuchh
yahan tak raushni aati kahan thi

duniya shayad bhuul rahi hai
chahat kuchh uncha sunti hai

jin par main thoDa sa bhi asan hua huun
vahi bata sakte hain kitna mushkil tha main

pata nahin ye tamanna-e-qurb kab jaagi
mujhe to sirf use sochne ki aadat thi

vo baat soch ke main jis ko muddaton jiita
bichhaDte vaqt batane ki kya zarurat thi

bahut hasin raat hai magar tum to so rahe ho
nikal ke kamre se ik nazar chaandni to dekho

vo basti naa-khudaaon ki thi lekin
mile kuchh Dubne vaale vahaan bhi

jaise ye mez miTTi kaa haathi ye phuul
ek kone mein ham bhi hain rakkhe hue

kis tarah aae hain is pahli mulaaqaat talak
aur mukammal hai judaa hone ki tayyaari bhi

kahin na thaa vo dariyaa jis kaa saahil thaa main
aankh khuli to ik sahraa ke muqaabil thaa main

manzilon par ham milein ye tai huaa
vaapsi mein saath pakkaa kar liyaa