vo baat soch ke main jis ko muddaton jiitaa — Shariq Kaifi

bahut hasin raat hai magar tum to so rahe ho
nikal ke kamre se ik nazar chaandni to dekho

vo basti naa-khudaaon ki thi lekin
mile kuchh Dubne vaale vahaan bhi

jaise ye mez miTTi kaa haathi ye phuul
ek kone mein ham bhi hain rakkhe hue

kis tarah aae hain is pahli mulaaqaat talak
aur mukammal hai judaa hone ki tayyaari bhi

kahin na thaa vo dariyaa jis kaa saahil thaa main
aankh khuli to ik sahraa ke muqaabil thaa main

manzilon par ham milein ye tai huaa
vaapsi mein saath pakkaa kar liyaa

jinhein ye fikr nahin sar rahe rahe na rahe
vo sach hi kahte hain jab bolne pe aate hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

bagulaa jin ke sar par chatr-e-shaahi hai zamin masnad
vahi aqlim-e-gham mein aah ki naubat bajaate hain

us ko sochun to dhyaan mein mere
khushbu aati hai pahli baarish ki

maango samundaron se na saahil ki bhiik tum
haan fikr o fan ke vaaste gahraai maang lo

tere bin hayaat ki soch bhi gunaah thi
ham qarib-e-jaan tiraa hisaar dekhte rahe