tum hamaare khuun ki qimat na puchho — Tahir Azeem

taasir nahin rahti alfaaz ki bandish mein
main sach jo nahin kahtaa lahje kaa asar jaataa

— Tahir Azeem

shahr ki is bhiiD mein chal to rahaa huun
zehn mein par gaanv kaa naqsha rakhaa hai

— Tahir Azeem

un baaton par mat jaanaa jo 'aam huiin
dekho kitni sachchaai hai aankhon mein

— Tahir Azeem

jo tire intizaar mein guzre
bas vahi intizaar ke din the

— Tahir Azeem

ye jo maazi ki baat karte hain
sochte honge haal se aage

— Tahir Azeem

barson pahle jis dariyaa mein utraa thaa
ab tak us ki gahraai hai aankhon mein

— Tahir Azeem

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

— Aabid Adeeb

ret par ik nishaan hai shaayad
ye hamaaraa makaan hai shaayad

— Muzaffar Abdali

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

— Irfan Sattar

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

kaho kyaa mehrbaan naa-mehrbaan taqdir hoti hai
kahaa maan ki duaaon mein baDi taasir hoti hai

— Anjum Khaleeq

ghulaami mein na kaam aati hain shamshirein na tadbirein
jo ho zauq-e-yaqin paidaa to kaT jaati hain zanjirein

— Allama Iqbal