Tahir Azeem

barson pahle jis dariyaa mein utraa thaa
ab tak us ki gahraai hai aankhon mein

taasir nahin rahti alfaaz ki bandish mein
main sach jo nahin kahtaa lahje kaa asar jaataa

tum hamaare khuun ki qimat na puchho
is mein apne zarf kaa arsa rakhaa hai

shahr ki is bhiiD mein chal to rahaa huun
zehn mein par gaanv kaa naqsha rakhaa hai

un baaton par mat jaanaa jo 'aam huiin
dekho kitni sachchaai hai aankhon mein

jo tire intizaar mein guzre
bas vahi intizaar ke din the

ye jo maazi ki baat karte hain
sochte honge haal se aage

mujh ko bhi haq hai zindagaani kaa
main bhi kirdaar huun kahaani kaa

soch apni zaat tak mahdud hai
zehn ki kyaa ye tabaahi kuchh nahin

main tire hijr mein jo zinda huun
sochtaa huun visaal se aage

main tire hijr ki giraft mein huun
ek sahraa hai mubtalaa mujh mein

jo bahut be-qaraar rakhte the
haan vahi to qaraar ke din the