rivaayaton ko salibon se kar diyaa aazaad — Tanveer Ahmad Alvi

vo daaeron se jo baahar na aa sake 'tanvir'
vo rasm-e-gardish-e-parkaar toD di main ne

mil bhi jaataa jo kahin aab-e-baqaa kyaa karte
zindagi khud bhi thi jiine ki sazaa kyaa karte

palak jhapakne mein kuchh khvaab TuuT jaate hain
jo but-shikan hai vahi lamha but-taraash bhi thaa

maangne ko to yahaan apne sivaa kuchh bhi na thaa
lab pe aataa bhi agar harf-e-duaa kyaa karte

teri yaadon ki kahaani to nahin hai 'tanvir'
dil pe dastak jo diyaa kartaa hai khushbu ki tarah

lamha-dar-lamha guzartaa hi chalaa jaataa hai
vaqt khush-bu hai bikhartaa hi chillaa jaataa hai