aisi pyaas aur aisaa sabr — Vikas Sharma Raaz

muddatein ho gaiin hisaab kiye
kyaa pataa kitne rah gae hain ham

— Vikas Sharma Raaz

iraada to nahin hai khud-kushi kaa
magar main zindagi se khush nahin huun

— Vikas Sharma Raaz

dekhnaa chaahtaa huun gum ho kar
kyaa koi DhunD ke laataa hai mujhe

— Vikas Sharma Raaz

jise dekho ghazal pahne hue hai
bahut sastaa ye zevar gayaa hai

— Vikas Sharma Raaz

asar hai ye hamaari dastakon kaa
jahaan divaar thi dar ho gayaa hai

— Vikas Sharma Raaz

mujh ko aksar udaas karti hai
ek tasvir muskuraati hui

— Vikas Sharma Raaz

sab ummidein mire aashob-e-tamannaa tak thiin
bastiyaan ho gaiin gharqaab to dariyaa utraa

— Hasan Abidi

dil ki lahron kaa tul-o-arz na puchh
kabhu dariyaa kabhu safinaa hai

— Shaikh Zahuruddin Hatim

chaand hai paani mein yaa bhule hue chehre kaa aks
saahil-e-dariyaa pe dekho main bhi hairaani mein huun

— Kausar Mazhari

mujid jo nuur kaa hai vo meraa charaagh hai
parvaana huun main anjuman-e-kaaenaat kaa

— Agha Hajju Sharaf

chaand bhi hairaan dariyaa bhi pareshaani mein hai
aks kis kaa hai ki itni raushni paani mein hai

— Farhat Ehsas

miri is chashm-e-tar se abr-e-baaraan ko hai kyaa nisbat
ki vo dariyaa kaa paani aur ye khun-e-dil hai barsaati

— Nazeer Akbar Abadi