mujh ko aksar udaas karti hai — Vikas Sharma Raaz

ye sadaa kaash usi ne di ho
is tarah vo hi bulaataa hai mujhe

ishq binaai baDhaa detaa hai
jaane kyaa kyaa nazar aataa hai mujhe

main to kisi julus mein gayaa nahin
miraa makaan kyuun jalaa diyaa gayaa

muddatein ho gaiin hisaab kiye
kyaa pataa kitne rah gae hain ham

iraada to nahin hai khud-kushi kaa
magar main zindagi se khush nahin huun

ek baras aur biit gayaa
kab tak khaak uDaani hai

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

be-khud aisaa kiyaa khauf-e-shab-e-tanhaai ne
subah se shama jalaa di tire saudaai ne

aur kuchh tohfa na thaa jo laate ham tere niyaaz
ek do aansu the aankhon mein so bhar laae hain ham

ik yaad rah gai hai magar vo bhi kam nahin
ik dard rah gayaa hai so rakhnaa sambhaal kar