bahut se gham chhupe honge hansi mein — Waqar Manvi

dil mein jo mar jaae vo hai armaan
jo nikle armaan nahin hai

— Waqar Manvi

vaqaar' ai kaash meri umr mein shaamil na ki jaae
vo muddat haan vahi muddat jo guzri un ki furqat mein

— Waqar Manvi

kahaan milegi bhalaa is sitamgari ki misaal
taras bhi khaataa hai mujh par tabaah kar ke mujhe

— Waqar Manvi

hamaari zindagi kahne ki had tak zindagi hai bas
ye shiraaza bhi dekhaa jaae to barham hai barson se

— Waqar Manvi

gharib ko havas-e-zindagi nahin hoti
bas itnaa hai ki vo izzat se marnaa chaahtaa hai

— Waqar Manvi

saliqa bolne kaa ho to bolo
nahin to chup bhali hai lab na kholo

— Waqar Manvi

jab ki pahlu se yaar uThtaa hai
dard be-ikhtiyaar uThtaa hai

— Mir Taqi Mir

gham hai na ab khushi hai na ummid hai na yaas
sab se najaat paae zamaane guzar gae

— Khumar Barabankavi

ye aansu ponchh lijiye aur muskuraaiye
chaara nahin hai koi bhi rukhsat kiye baghair

— Nasim Zahid

husn jalva dikhaa gayaa apnaa
ishq baiThaa rahaa udaas kahin

— Saifuddin Saif

main ne apni palkon par gham-kade sajaae hain
aarzu ke maatam mein sogvaar hasti hai

— Hanif Fauq

ham haal to kah sakte hain apnaa pa kahein kyaa
jab vo idhar aate hain to tanhaa nahin aate

— Nazeer Akbar Abadi