saliqa bolne kaa ho to bolo — Waqar Manvi

bahut se gham chhupe honge hansi mein
zaraa in hansne vaalon ko TaTolo

dil mein jo mar jaae vo hai armaan
jo nikle armaan nahin hai

vaqaar' ai kaash meri umr mein shaamil na ki jaae
vo muddat haan vahi muddat jo guzri un ki furqat mein

kahaan milegi bhalaa is sitamgari ki misaal
taras bhi khaataa hai mujh par tabaah kar ke mujhe

hamaari zindagi kahne ki had tak zindagi hai bas
ye shiraaza bhi dekhaa jaae to barham hai barson se

gharib ko havas-e-zindagi nahin hoti
bas itnaa hai ki vo izzat se marnaa chaahtaa hai

main baDaa ho gayaa huun magar bachpanaa
mere dil se kabhi bhi gayaa hi nahin

koi hangaama-e-hayaat nahin
raat khaamosh hai sahar khaamosh

nazar jhuk rahi hai khamoshi hai lab par
hayaa hai adaa hai ki an-ban hai kyaa hai

ek muddat se khamoshi kaa hai pahra har-su
jaane kis or gae shor machaane vaale

ye jo chupke se aae baiThe hain
laakh fitne uThaae baiThe hain

main khushbuon ke zikr pe khaamosh hi rahaa
haalaanki ek phuul mire haafize mein thaa