ehsaan khaak-e-sahraa pe majnun kaa hai bahut — Zeeshan Niyazi

mujh se naaraaz bhi nahin hai vo
aur us ko manaa rahaa huun main

— Zeeshan Niyazi

muddaton khud se mulaaqaat nahin hoti hai
raat hoti hai magar raat nahin hoti hai

— Zeeshan Niyazi

sau baar TuTne pe bhi haaraa nahin huun main
miTTi kaa ik charaagh huun taaraa nahin huun main

— Zeeshan Niyazi

us ne itnaa kiyaa nazar-andaaz
sab ki nazron mein aa gae hain ham

— Zeeshan Niyazi

fazaaein raqs mein hain aur baras rahi hai sharaab
kisi ne jaam su-e-asmaan uchhaalaa hai

— Zeeshan Niyazi

main din ke ujaale mein tujhe soch rahaa huun
mahsus ye hotaa hai ki kuchh raushni kam hai

— Zeeshan Niyazi

taa-falak le gai betaabi-e-dil tab bole
hazrat-e-ishq ki pahlaa hai ye ziinaa apnaa

— Jurat Qalandar Bakhsh

shab-e-vaada fasil-e-hijr se aage chamaktaa hai tiraa ism-e-sitaara-ju
ki jaise koi paivand-e-ridaa-e-subh aa jaae kisi qindil ki zad mein

— Zahid Masood

kuchh aur din abhi is jaa qayaam karnaa thaa
yahaan charaagh vahaan par sitaara dharnaa thaa

— Ateequllah

zamaana laakh sitaaron ko chhu ke aa jaae
abhi dilon ko magar haajat-e-rafu hai vahi

— Khaleel Tanveer

mat tang ho kare jo falak tujh ko tang-dast
aahista khinchiye jo dabe zer-e-sang dast

— Baqaullah 'Baqa'

nairangiyaan falak ki jabhi hain ki hon baham
kaali ghaTaa safed pyaale sharaab-e-surkh

— Bayan Meeruthi