kuchh aur din abhi is jaa qayaam karnaa thaa — Ateequllah

tum ne to faqat us ki rivaayat hi suni hai
ham ne vo zamaana bhi guzarte hue dekhaa

zaraa se rizq mein barkat bhi kitni hoti thi
aur ik charaagh se kitne charaagh jalte the

ye raah-e-talab yaaro gumraah bhi karti hai
saamaan usi kaa thaa jo be-sar-o-saamaan thaa

aaina aaina tairtaa koi aks
aur har khvaab mein dusraa khvaab hai

kuchh badan ki zabaan kahti thi
aansuon ki zabaan mein thaa kuchh

fazaa mein haath to uTThe the ek saath kai
kisi ke vaaste koi duaa na kartaa thaa

zamaana laakh sitaaron ko chhu ke aa jaae
abhi dilon ko magar haajat-e-rafu hai vahi

taa-falak le gai betaabi-e-dil tab bole
hazrat-e-ishq ki pahlaa hai ye ziinaa apnaa

shab-e-vaada fasil-e-hijr se aage chamaktaa hai tiraa ism-e-sitaara-ju
ki jaise koi paivand-e-ridaa-e-subh aa jaae kisi qindil ki zad mein

istiaare zamin se jaaein
ik ghazal aasmaan se utre

jitni baTni thi baT chuki ye zamin
ab to bas aasmaan baaqi hai

haath uThaataa hai duaaon ko falak bhi us dam
jab parinda koi parvaaz ko par taultaa hai