Sitara

vatan kī fikr kar nādāñ musībat aane vaalī hai
tirī barbādiyoñ ke mashvare haiñ āsmānoñ meñ

sitāroñ se aage jahāñ aur bhī haiñ
abhī ishq ke imtihāñ aur bhī haiñ

na būjho āsmāñ par tum sitāre
hamārī aah kī chingāriyāñ haiñ

chalte chalte na ḳhalish kar falak-e-dūñ se 'nazīr'
fā.eda kyā hai kamīne se jhagaḌ kar chalnā

uqābī ruuh jab bedār hotī hai javānoñ meñ
nazar aatī hai un ko apnī manzil āsmānoñ meñ

kal mire qatl ko is Dhab se vo bāñkā niklā
muñh se jallād-e-falak ke bhī ahāhā niklā

jinheñ maiñ DhūñDhtā thā āsmānoñ meñ zamīnoñ meñ
vo nikle mere zulmat-ḳhāna-e-dil ke makīnoñ meñ

purāne haiñ ye sitāre falak bhī farsūda
jahāñ vo chāhiye mujh ko ki ho abhī nau-ḳhez

tū itnī dil-zada to na thī ai shab-e-firāq
aa tere rāste meñ sitāre luTā.eñ ham

shab vahī lekin sitāra aur hai
ab safar kā isti.āra aur hai

haañ ai falak-e-pīr javāñ thā abhī aarif
kyā terā bigaḌtā jo na martā koī din aur

bachchoñ ke chhoTe hāthoñ ko chāñd sitāre chhūne do
chaar kitābeñ paḌh kar ye bhī ham jaise ho jā.eñge

ab zamīñ par koī gautam na mohammad na masīh
āsmānoñ se na.e log utāre jaa.eñ

sitāra kyā mirī taqdīr kī ḳhabar degā
vo ḳhud farāḳhi-e-aflāk meñ hai ḳhvār o zubūñ

mirī fazā meñ hai tartīb-e-kā.enāt kuchh aur
ajab nahīñ jo tirā chāñd hai sitāra mujhe

vo qahr thā ki raat kā patthar pighal paḌā
kyā ātishīñ gulāb khilā āsmān par

'zafar' zamīñ-zād the zamīñ se hī kaam rakkhā
jo āsmānī the āsmānoñ meñ rah ga.e haiñ

gungunātī huī aatī haiñ falak se būñdeñ
koī badlī tirī pāzeb se Takrā.ī hai

rafāqatoñ kā mirī us ko dhyān kitnā thā
zamīn le lī magar āsmān chhoḌ gayā

mat sahl hameñ jaano phirtā hai falak barsoñ
tab ḳhaak ke parde se insān nikalte haiñ