aavaazon mein bahte bahte — Ziaul Mustafa Turk

abr se aur dhuup se rishta hai ek saa miraa
aaine aur charaagh ke biich kaa faasla huun main

— Ziaul Mustafa Turk

tire ghayaab ko maujud mein badalte hue
kabhi main khud ko tire naam se bulaataa huaa

— Ziaul Mustafa Turk

samajh paayaa nahin par sun rahaa huun
vo sargoshi mein kyaa kyaa kah rahi hai

— Ziaul Mustafa Turk

mere girya se na aazaar uThaane se huaa
faasla tai nai divaar uThaane se huaa

— Ziaul Mustafa Turk

thoDi si baarish hoti hai
kitni jaldi bhar jaataa huun

— Ziaul Mustafa Turk

qatra qatra chhat se hi risne lagi
dhuup kaa rasta na thaa divaar mein

— Ziaul Mustafa Turk

main baDaa ho gayaa huun magar bachpanaa
mere dil se kabhi bhi gayaa hi nahin

— Divyansh Rawat

raat yuun dil mein tiri khoi hui yaad aai
jaise viraane mein chupke se bahaar aa jaae

— Faiz Ahmad Faiz

baDaa maza ho jo mahshar mein ham karein shikva
vo minnaton se kahein chup raho khudaa ke liye

— Dagh Dehlvi

ek main huun ki is aashob-e-navaa mein chup huun
varna duniyaa mire zakhmon ki zabaan bolti hai

— Irfan Siddiqi

ye dil kaa karb labon tak kabhi na aaegaa
mire liye ye khamoshi kaa irtiqaa hi sahi

— Anwar Feroz

chup-chaap apne yaar ki dahliz par mare
duniyaa kahegi ham bhi kisi chiiz par mare

— Asad Awan