چراغ کشتہ سے قندیل کر رہا ہے مجھے وہ دست غیب جو تبدیل کر رہا ہے مجھے یہ میرے مٹتے ہوئے لفظ جو دمک اٹھے ہیں ضرور وہ کہیں ترتیل کر رہا ہے مجھے میں جاگتے میں کہیں بن رہا ہوں از سر نو وہ اپنے خواب میں تشکیل کر رہا ہے مجھے حریم ناز اور اک عمر بعد میں لیکن یہ اختصار جو تفصیل کر رہا ہے مجھے بدن پہ تازہ نشاں بن رہے ہیں جیسے کوئی مرے غیاب میں تحویل کر رہا ہے مجھے بدل رہے ہیں مرے خد و خال ترکؔ ابھی مسلسل آئینہ تاویل کر رہا ہے مجھے

غزل · Ghazal

sukut se bhi sukhan ko nikaal laataa huaa

سکوت سے بھی سخن کو نکال لاتا ہوا یہ میں ہوں لوح شکستہ سے لفظ اٹھاتا ہوا مکاں کی تنگی و تاریکی بیشتر تھی سو میں دیے جلاتا ہوا آئینے بناتا ہوا ترے غیاب کو موجود میں بدلتے ہوئے کبھی میں خود کو ترے نام سے بلاتا ہوا چراغ جلتے ہی اک شہر منکشف ہم پر اور اس کے بعد وہی شہر ڈوب جاتا ہوا بس ایک خواب کہ اس قریۂ بدن سے ہنوز نواح دل تلک اک راستہ سا آتا ہوا

غزل · Ghazal

mere girya se na aazaar uThaane se huaa

میرے گریہ سے نہ آزار اٹھانے سے ہوا فاصلہ طے نئی دیوار اٹھانے سے ہوا ورنہ یہ قصہ بھلا ختم کہاں ہونا تھا داستاں سے مرا کردار اٹھانے سے ہوا محمل ناز کی تاخیر کا یہ سارا فساد راہ افتادہ کو بیکار اٹھانے سے ہوا شاق گزرا ہے جو احباب کو وہ صدمہ بھی بزم میں مصرع تہہ دار اٹھانے سے ہوا یوں تو مصحف بھی اٹھائے گئے قسمیں بھی مگر آخری فیصلہ تلوار اٹھانے سے ہوا غم نہیں تخت کو اور بخت کو کھو دینے کا کب مرا ہونا بھی دستار اٹھانے سے ہوا جاگنا تھا مرا ہنگامۂ ہستی کا سبب حشر برپا بھی دگربار اٹھانے سے ہوا گوشۂ باغ ہوا خلد گزرنے سے ترے آئینہ عکس رخ یار اٹھانے سے ہوا

غزل · Ghazal

na thiin to duur kahin dhyaan mein paDi hui thiin

نہ تھیں تو دور کہیں دھیان میں پڑی ہوئی تھیں تمام آیتیں امکان میں پڑی ہوئی تھیں کواڑ کھلنے سے پہلے ہی دن نکل آیا بشارتیں ابھی سامان میں پڑی ہوئی تھیں وہیں شکستہ قدمچوں پہ آگ روشن تھی وہیں روایتیں انجان میں پڑی ہوئی تھیں ہم اپنے آپ سے بھی ہم سخن نہ ہوتے تھے کہ ساری مشکلیں آسان میں پڑی ہوئی تھیں پس چراغ میں جو سمتیں ڈھونڈتا رہا ترکؔ وہ ایک لفظ کے دوران میں پڑی ہوئی تھیں

Similar Poets