thoDi si baarish hoti hai — Ziaul Mustafa Turk

abr se aur dhuup se rishta hai ek saa miraa
aaine aur charaagh ke biich kaa faasla huun main

tire ghayaab ko maujud mein badalte hue
kabhi main khud ko tire naam se bulaataa huaa

samajh paayaa nahin par sun rahaa huun
vo sargoshi mein kyaa kyaa kah rahi hai

mere girya se na aazaar uThaane se huaa
faasla tai nai divaar uThaane se huaa

ham apne aap se bhi ham-sukhan na hote the
ki saari mushkilein aasaan mein paDi hui thiin

qatra qatra chhat se hi risne lagi
dhuup kaa rasta na thaa divaar mein

pyaaso raho na dasht mein baarish ke muntazir
maaro zamin pe paanv ki paani nikal paDe

chaand ne taan li hai chaadar-e-abr
ab vo kapDe badal rahi hogi

havaa shaakhon mein rukne aur ulajhne ko hai is lamhe
guzarte baadalon mein chaand haail hone vaalaa hai

sabza o gul kahaan se aae hain
abr kyaa chiiz hai havaa kyaa hai

sach ishq mein hain aashiq o maashuq baraabar
jo mushkil-e-majnun hai so hai mushkil-e-lailaa

us ne baarish mein bhi khiDki khol ke dekhaa nahin
bhigne vaalon ko kal kyaa kyaa pareshaani hui